Fljótdalshreppur er dæmigert landbúnaðarsvæði með sterkri skógræktarhefð. Sauðfjárrækt er aðalbúgreinin ásamt skógrækt en ferðaþjónusta fer vaxandi. Fjölmörg opinber störf eru í sveitarfélaginu,  hjá Fljótsdalsstöð Landsvirkjunar, Snæfellsstofu Vatnajökulsþjóðgarðs, Gunnarsstofnun á Skriðuklaustri og Fljótsdalshreppi. Nýsköpun í landbúnaði hefur leitt af sér fyrirtæki á borð við Sauðagull sem sérhæfir sig í úrvinnslu sauðamjólkur og Skógarafurðir sem sérhæf sig í úrvinnslu á timburafurðum sem skapað hafa ný störf í sveitinni. Öflug ferðaþjónustufyrirtæki eru á svæðinu; Hengifoss guesthouse, Klausturkaffi og Óbyggðasetrið. Auk þess eru nokkrir verktakar er tengjast bílaviðgerðum, vélavinnu og trésmíði.

Stór hluti hálendis Fljótsdalshrepps er innan Vatnajökulsþjóðgarðs, auk þess sem Eyjabakkasvæðið nýtur verndar á grundvelli Ramsarsamningsins. Ramsarsvæði eru votlendissvæði með alþjóðlegt gildi, einkum vegna búsvæði fugla. Náttúrufegurð svæðisins er einstök og veðurblíðan í dalnum vel þekkt. Ferðaþjónustan á Óbyggðasetrinu byggir á þessari einstöku nálægð við hálendið og menningu svæðisins. Víða liggja áhugaverðar göngu- og ferðaleiðir, s.s. að Hengifossi, Strútsfossi og lagt er upp frá Fljótsdals suður til Lónsöræfa en einnig uppá Snæfell hæsta fjall Íslands utan jökla. Vetrarferðaþjónusta er vaxandi.

Vegasamgöngur og tenging við nágrannabyggðalög er góð. Um 12 km eru frá Snæfellsstofu í Hallormsstaðaskóg og þaðan um 25 km til Egilsstaða. Fljótdalshreppur og Múlaþing skapa þannig eitt atvinnusvæði en á Egilsstöðum er jafnframt öll almenn grunnþjónusta, s.s. verslun, heilbrigðisstofnun, skólar og flugvöllur. Unnið er að uppbyggingu byggðakjarna í Fljótsdal.

 Innviðagreining Fljótsdalshrepps á íslensku

Infrastructure analysis of the municipality of Fljótsdalur